Kryetari i New Yorkut, Eric Adams, ka konfirmuar se në këtë qytet ezani mysliman do të thirret me altoparlantë gjatë namazit të xhumasë dhe gjatë iftarit si dhe muajit të Ramazanit.
“Për një kohë të gjatë ka pasur një ndjenjë që komunitetet tona nuk janë lejuar të përforcojnë thirrjet e tyre për namaz. Sot, ne po ulim burokracinë dhe po e bëjmë të qartë se xhamitë dhe shtëpitë e adhurimit janë të lira për të përforcuar ezanin e së premteve dhe gjatë Ramazanit pa lejen e nevojshme”, ka thënë Adams.
Udhëzimet e reja do t’u lejojnë xhamive në qytet të thërrasin ezanin midis orës 12:30 dhe 13:30 çdo të premte, dhe gjithashtu lejojnë që ezani të thirret gjatë lutjeve të mbrëmjes çdo natë të muajit të Ramazanit, raporton AA.
Nisma e re, e nisur nga NYPD, sqaron se thirrja për lutje është e lejuar në qytetin e Nju Jorkut dhe “nuk është e ndaluar pavarësisht kufizimeve në lagjet e qytetit”, thuhet në njoftim.
New Yorku tani bashkohet me qytete të tjera amerikane që kanë këtë rregull, duke përfshirë Minneapolisin.
