Kryeministri izraelit Benjamin Netanyahu tha të martën se ushtria izraelite nuk do të tërhiqet nga zonat e pushtuara në Rripin e Gazës derisa grupi palestinez Hamas të çarmatoset plotësisht.
“Unë mbetem i përkushtuar ndaj interesave tona të sigurisë”, deklaroi Netanyahu në një video të postuar në kompaninë amerikane të mediave sociale Facebook.
Videoja e tij erdhi mes mosmarrëveshjeve mbi një plan veprimi të propozuar nga Bordi i Paqes i Presidentit të SHBA-së, Donald Trump, për çarmatimin e Hamasit dhe tërheqjen e Izraelit nga Gaza sipas një marrëveshjeje armëpushimi.
“Ne nuk do të tërhiqemi nga pozicionet tona aktuale derisa Hamasi të çarmatoset plotësisht”, tha ai.
Ushtria izraelite aktualisht mban të pushtuar rreth 70% të Rripit të Gazës, pas një lufte gjenocidale që ka vrarë më shumë se 73,000 palestinezë dhe ka plagosur mbi 174,000 që nga tetori i vitit 2023, sipas shifrave palestineze.
Izraeli gjithashtu ka vazhduar të shkelë armëpushimin që ka qenë në fuqi që nga 10 tetori 2025, duke vrarë 1,252 palestinezë dhe duke plagosur 4,120 të tjerë.
Tel Avivi këmbëngul që çarmatimi duhet të përfundojë para çdo tërheqjeje, ndërsa plani i veprimit i shpallur nga Bordi i Paqes dhe i pranuar nga Hamasi kërkon që të dy hapat të zbatohen gradualisht dhe paralelisht.
Plani i veprimit parashikon transferimin e administratës në Gaza te një komitet teknokratik palestinez, vendosjen e një force ndërkombëtare stabilizimi, vendosjen e armëve nën përgjegjësinë e Komitetit Kombëtar për Administrimin e Gazës nën mbikëqyrje ndërkombëtare, së bashku me një tërheqje graduale të Izraelit dhe përpjekje për rindërtim.
Megjithatë, bordi tha të hënën, pas një takimi midis të dërguarit të tij Nikolay Mladenov dhe Netanyahut, se një tërheqje e plotë izraelite nuk do të ndodhte para se të çmontoheshin armët e rënda dhe të lehta, si dhe tunelet.
