Mes presionit ndërkombëtar në rritje për shkak të situatës katastrofike në Rripin e Gazës, kryeministri izraelit, Benjamin Netanyahu, ka mbajtur të dielën një konferencë për shtyp me mediat vendase dhe të huaja.
Kjo pasoi vendimin e shpallur të premten për një ripushtim të plotë të territorit të Gazës – një vendim që ka nxitur reagime të ashpra nga vendet evropiane dhe ato arabe.
Netanyahu këmbëngul se operacioni ushtarak është mënyra më e shpejtë për t’i dhënë fund luftës, duke shtuar se qëllimi final i Izraelit nuk është pushtimi, por shpërbërja e plotë e Hamasit.
“Qëllimi ynë nuk është të pushtojmë Gazën. Qëllimi ynë është të çlirojmë Gazën, ta çlirojmë atë nga terroristët e Hamasit. Lufta mund të përfundojë nesër nëse Gaza – ose më saktë nëse Hamasi – i lëshon armët dhe i liron të gjithë pengjet e mbetura”, tha ai.
Izraeli tashmë kontrollon rreth tre të katërtat e territorit të shkatërruar të Gazës.
Organizata e Kombeve të Bashkuara ka kërkuar një armëpushim të menjëhershëm dhe një korridor të sigurt për ndihmën humanitare, ndërsa vendet evropiane i kanë bërë thirrje Izraelit që të mos ndjekë planet për ripushtim.
Në një reagim të fortë, kancelari gjerman deklaroi se do të ndalojë dërgimin e armëve drejt Izraelit – veçanërisht atyre që mund të përdoren në luftimet në Gaza.
I pyetur gjatë konferëncës në lidhje me këtë vendim të qeverisë gjermane , Netanyahu u përgjigj se Izraeli do e fitojë luftën me apo pa ndihmën e vendeve të tjera:
“Ne nuk do ta harrojmë atë që ndodhi dhe do të bëjmë gjithçka që duhet për të mbrojtur vendin tonë dhe për të mbrojtur popullin tonë, për të mbrojtur të ardhmen tonë dhe do ta fitojmë luftën, me ose pa mbështetjen e të tjerëve.”
Ndërkohë në Gaza, kriza humanitare vazhdon të përkeqësohet nga ora në orë.
Zyra e Medias së Gazës njoftoi se gjatë dy javëve të fundit kanë hyrë mesatarisht vetëm 86 kamionë ndihme në ditë – duke përmbushur vetëm 14 për qind të nevojave të popullsisë.
Izraeli akuzohet për bllokadë të plotë të ndihmave dhe për shkatërrim të sistemit bujqësor – duke shkaktuar uri të përhapur.
Vetëm në 24 orët e fundit janë raportuar pesë vdekje të reja nga uria – përfshirë dy fëmijë. Shifra tragjike e fëmijëve të vdekur nga uria që prej fillimit të luftës ka arritur në 100./teve1/
