Kryeministri izraelit, Benjamin Netanyahu, është në Uashington për një takim të dytë me Donald Trump që nga kthimi i presidentit amerikan në detyrë.
Dyshja pritet të diskutojnë luftën 18-mujore në Gaza, kërcënimin bërthamor të Iranit dhe tarifat e SHBA-së.
Kryeministri izraelit, duke njoftuar takimin tha se ishte duke vizituar vendin me ftesë të Trump për të folur për përpjekjet për lirimin e pengjeve izraelite nga Gaza, si dhe tarifat e reja amerikane.
Takimi do të jetë përpjekja e parë e një udhëheqësi të huaj për të negociuar një marrëveshje pasi administrata Trump njoftoi tarifa gjithëpërfshirëse në shumë vende javën e kaluar, duke përfshirë një tarifë 17% për mallrat izraelite.
“Unë jam lideri i parë ndërkombëtar, lideri i parë i huaj, i cili do të takohet me Presidentin Trump për këtë çështje, e cila është kaq e rëndësishme për ekonominë izraelite”, tha Netanyahu në një deklaratë të dielën.
SHBA –ja është aleati më i ngushtë i Izraelit dhe partneri më i madh tregtar.
Izraeli kishte shpresuar të shmangte tarifat e reja duke anuluar tarifat e mbetura për importet amerikane, një ditë përpara njoftimit të Trump.
Gjatë vizitës së fundit të Netanyahut në shkurt, Trump tronditi botën duke propozuar marrjen nën kontroll të Rripit të Gazës, largimin e më shumë se 2 milionë palestinezëve dhe rizhvillimin e territorit të pushtuar si një “Rivierë e Lindjes së Mesme” , në fakt duke miratuar spastrimin etnik të popullit të Gazës.
Që atëherë, Izraeli ka rifilluar bombardimet në Gaza, duke i dhënë fund gati dy muaj armëpushim me Hamasin që ishte ndërmjetësuar nga SHBA, Egjipti dhe Katari.
Gati 1,400 palestinezë janë vrarë në operacionet e rinisura izraelite në Gaza, sipas zyrtarëve palestinezë shëndetësorë, duke e çuar numrin total të të vdekurve që nga fillimi i luftës në më shumë se 50,000.
Izraeli gjithashtu ka ndaluar të gjitha furnizimet me ushqim, karburant dhe ndihma humanitare në Gaza.
Vizita e Netanyahut në SHBA vjen pasi ai përballet me presion në shtëpi për t’u kthyer në negociatat e armëpushimit dhe për të siguruar lirimin e pengjeve të mbetura në Gaza.
