Ish-ambasadori i Shqipërisë në OKB, Agim Nesho, në emisionin “Mesditë” në Tëvë1 komentoi protestat e organizuara në Tiranë në mbështetje të ish-krerëve të Ushtrisë Çlirimtare të Kosovës, të cilët po përballen me procesin gjyqësor në Hagë.
“Nuk besoj që kjo protestë në Tiranë do të ketë ndonjë ndikim të madh në procesin gjyqësor në Hagë, por është shumë e rëndësishme që populli shqiptar të jetë pritës,” tha Nesho, duke theksuar se epopeja e lavdishme e UÇK-së dhe përfaqësuesve të saj do të mbetet gjithmonë në ndërgjegjen e kombit shqiptar.
Ai shtoi se “manifestimet e tilla janë për të rritur ndërgjegjen e popullit që, kur vjen puna për mbrojtjen e vlerave të kombit, ne duhet të jemi gjithmonë më të bashkuar. Kjo është ajo gjëja pozitive dhe kjo protestë do të jetë në vazhdimësi të të gjithë protestave të tjera.”
Në lidhje me ndikimin diplomatik, Nesho theksoi se “në Hagë, në procesin gjyqësor nuk do të ketë ndonjë ndikim të tillë, sepse sensibilizimi diplomatik vjen përmes veprimeve të shtetit, veçanërisht të Shqipërisë.” Sipas tij, deri tani përveç patriotizmit deklarativ nga kryeministri Rama, nuk ka funksionuar si duhet.
“Nëse do të kishte presion ndaj gjykatës që po merret më shumë me aspekte jo konkrete, jo me ato që quhen krime të UÇK-së, por për të dënuar lidershipin e saj si organizatë që ka kryer krime, kjo është jo vetëm e pa justifikueshme, por edhe e dënueshme dhe jashtë kompetencave të saj,” përfundoi Nesho.
