Vetëm edhe nesër do të jetë Kryeprokuror i Shtetit, pozitë të cilën e mban tash e 7 vjet.
Por, ende nuk dihet se kush do ta zëvendësojë Aleksandër Lumezin në njërin prej posteve më të rëndësishme në sistemin e drejtësisë në vend.
Pas kritikave të faktorit ndërkombëtar e shoqërisë civile për procesin e përzgjedhjes së Kryeprokurorit të ri, presidenca ka vendosur t’i marrë parasysh vërejtjet e të kërkojë dokumentacion shtesë para se të vendosë për dekretim.
“Në përputhje me kompetencat kushtetuese, Presidentja po e trajton emërimin e kryeprokurorit të propozuar. Do të kërkojmë dokumentacion shtesë sa i përket këtij propozimi, sikurse do t`i dëgjojmë të gjitha palët e përfshira në monitorimin e këtij procesi, përfshirë edhe partnerët ndërkombëtarë, të cilët tashmë i kanë paraqitur vërejtjet e tyre për këtë proces. Do të merren parasysh vërejtjet dhe pas trajtimit të hollësishëm, Presidentja do ta marrë një vendim. Stafi i Presidentes tashmë ka filluar këto konsultime, ndërkaq Presidentja do të vazhdojë takimet në ditët në vijim”, thuhet në përgjigjen e Zyrës së Presidentes.
Nga shoqëria civile thonë se është në diskrecionin e Presidentes afati i dekretimit të kryeprokurorit të ri të shtetit.
Megjithatë Yll Zekaj nga Instituti i Kosovës për Drejtësi thotë se pas ditës së nesërme pozicioni nuk duhet të mbetet vakant dhe duhet të caktohet Ushtruesi i Detyrës.
“Normativa përcakton që në momentin kur nuk kemi zgjedhjen e kryeprokurorit të shtetit deri në datën kur pozicion mbetet vakant. Në rastin e Kosovës është data 21 prill kur kalon afati shtatëvjeçar i kryeprokurorit të shtetit aktual dhe i njëjti përfundon më datën 21, atëherë Këshilli Prokurial i Kosovs obligohet që të caktojë një Ushtrues Detyre deri në momentin kur të zgjidhet kryeprokurori i ri i shtetit”, tha Zekaj.
Nga Këshilli Prokurorial nuk kanë konfirmuar nëse do të caktohet një Ushtrues Detyre të premten. Zëdhënësi i Prokurorisë së Shtetit, Ekrem Lutfiu i ka thënë televizionit se ka kohë edhe ditën e nesërme për të vendosur.
Me 11 vota pro, më 6 prill Këshilli Prokurorial kishte propozuar Blerim Isufajn për Kryeprokuror të Shtetit. Megjithatë shoqëria civile e mbështetur edhe nga ndërkombëtarët kishin kërkuar anulimin e procesit dhe përsëritjen e tërë konkursit për kryeprokuror të shtetit. Organizatat që monitoruan procesin u ankuan se vlerësimi ndaj kandidatëve ishte jomeritorë.
Raporti i gazetarit Gojart Jashari.
