Kuvendi i Kosovës do të mbajë nesër një seancë të jashtëzakonshme, në të cilën do të diskutohet rreth propozim-rezolutës për mbështetjen urgjente financiare të Policisë.
Sipas njoftimit të Kuvendit, seanca pritet të fillojë nga ora 11:00, përcjell teve1.info
Kjo kërkesë për seancë të jashtëzakonshme është bërë nga kryetari i Grupit Parlamentar të Partisë Demokratike të Kosovës (PDK), Abelard Tahiri, teksa mbështetja ka edhe nga Lidhja Demokratike e Kosovës dhe Aleanca për Ardhmërinë e Kosovës.
Në rezolutën e prezantuar nga Tahiri në seancën e fundit të Kuvendit, përfshihet buxhetimi shtesë për pension të parakohshëm, shtesat e rrezikshmërisë dhe sigurimi shëndetësor për policët.
PDK-ja ka propozuar që 15 ditë nga miratimi i saj të ndahen mjetet për shtesat e rrezikshmërisë për Policinë e Kosovës.
Po ashtu, është kërkuar edhe që brenda 60 ditëve të miratohet Projektligji për pensionim të parakohshëm të zyrtarëve policorë, kurse nga 1 janari 2024 të mbulohet pagesa e sigurimit shëndetësor. /Teve1.info/