Nesër, më 15 shtator, nga ora 09:30, në Gjykatën Themelore në Prishtinë është caktuar të mbahet seanca për shqyrtimin fillestar ndaj 21 të akuzuarve për veprën penale “Krime lufte kundër popullatës civile”.
Në njoftimin e Gjykatës Themelore në Prishtinë thuhet se gjykimi në këtë çështje do të zhvillohet në mungesë të të akuzuarve, pasi deri në momentin e ngritjes së aktakuzës ata kanë qenë të paarritshëm për organet e drejtësisë.
”Për këtë arsye, përmes kësaj komunikate ju bëhet thirrje të pandehurve, të lartcekur që të paraqiten dhe të dorëzohen para organeve të ndjekjes së Republikës së Kosovës.Gjithashtu, u bëhet thirrje të gjithë personave që posedojnë informacione relevante lidhur me vendndodhjen e të akuzuarve, që t’i komunikojnë këto informacione Policisë së Kosovës apo organeve tjera kompetente”, thuhet në njoftimin e Gjykatës.
Aktakuza ndaj 21 të pandehurve ishte ngritur nga Prokuroria Speciale më 15 gusht 2025.
“Departamenti Special, njofton opinionin publik dhe të gjitha mediat se ka caktuar seancën e shqyrtimit fillestar në çështjen penale PS.nr.48/25, e cila ka për objekt shqyrtimi aktakuzën e ngritur nga Prokuroria Speciale e Republikës se Kosovës – PPS.nr.59/2022 të datës 15.08.2025, kundër të pandehurve: Zlatomir Peshiq, Mladen Cirkoviq, Radomir Markoviq, Dushko Adamaoviq, Obrad Stevanoviq, Zhivko Trajkoviq, Goran Radosavljeviq, Bogoljub Janiçeviq, Slavisha Ivanoviq, Boshko Vukiqeviq, Sreten Popoviq, Nikolla Petroviq, Krsman Jeliq, Ljubisha Stojimiroviq, Bozhidar Deliq, Radojko Stefanoviq, Dragan Zhivanoviq, Millosh Doshan, Ljubinko Cvetiq, Bozhidar Filiq, dhe Millovan Kovaqeviq – për shkak të veprës penale Krimet e Luftës kundër popullsisë civile nga neni 142 lidhur me nenin 22 të Ligjit Penal të ish Republikës Socialiste Federative të Jugosllavisë, e inkriminuar tani sipas nenit 144,145,146 dhe 147 lidhur me nenin 31 të Kodit Penal të Republikës së Kosovës (KPRK)”, thuhet më tej në aktakuzë.
