Erdhën të prangosur, në nisjen e gjyqit për vrasjen që tronditi shtetin në nëntor të vitit 2023.
Tre të akuzuarit Naim Murseli, Kushtrim Kokalla e Granit Plavën, filluan zyrtarisht përballjen me pretendimet e prokurorisë për vrasjen në bashkëkryerje të Liridona Ademajt.
Ata edhe në shqyrtimin kryesor, mohuan fajësinë.
Sipas prokurorisë, përgjatë gjykimit do të vërtetohet se të akuzuarit kanë kryer veprat penale.
Prokuroria do të thërras për të dëshmuar edhe vëllaun e Liridonës, e disa të tjerë për të cilët dha sqarime në fjalën hyrëse.
“Shumë me rëndësi është dëshmia e ekspertit Naim Uka, mjek ligjor, i cili ka ekspertuar trupin e të ndjerës Liridona Ademaj.Shumë është me rëndësi që të dëshmojë edhe dëshmitari Jeton Binaku nga i cili i akuzuari i tyre Plava e ka huazuar veturën.Si dëshmi mund të na shërbejë Valon Lukaj, i cili në ditën kritike, të parin e ka thirrur Naim Murseli dhe i cili të akuzuarit ia ka siguruar qëndrimin dhe ku më vonë është bashkangjitur Kushtrim Kokalla.”,ka thënë prokuroria Perlinçeviq
Mbrojtja e Naim Murselit, e theksoi si shumë të rëndësishme ekzaminimin të gjendjes mendore të Murselit, gjë të cilën e kishin theksuar edhe në faza të mëhershme të procedurës.
Gjykata ia aprovoi këtë kërkesë mbrojtjes së Murselit.
Familja Ademaj, shpreson që e vërteta e vrasjes së bijës së tyre të zbardhet.
Ndërkohë, mbrojtja e Kokallës e Plavës, u shprehën se akuzat ndaj tyre nuk janë të argumentuara.
Gjyqi do të vazhdojë me dëgjimin e dëshmitarëve në muajin korrik, ku i pari nga dëshmitarët do të dëgjohet vëllau i Liridona Ademaj.
