Me ardhjen e pranverës dhe rritjen graduale të temperaturave, lëkura e fytyrës kalon në një fazë të re fiziologjike.
Sipas dermatologëve dhe studimeve të publikuara në revista si “Journal of Clinical and Aesthetic Dermatology”, ndryshimet në lagështi, rrezatim UV dhe prodhimin e yndyrës së lëkurës e bëjnë të domosdoshme përshtatjen e rutinës së kujdesit për fytyrën.
Pse duhet ndryshuar rutina në pranverë–verë?
Në dimër, lëkura zakonisht bëhet më e thatë për shkak të ajrit të ftohtë dhe ngrohjes artificiale. Kjo çon në përdorimin e kremrave më të rëndë dhe hidratues më të yndyrshëm.
Por në pranverë dhe verë, rritja e temperaturës dhe lagështisë stimulon gjëndrat dhjamore të prodhojnë më shumë sebum, gjë që mund të shkaktojë akne, pore të bllokuara dhe shkëlqim të tepërt të fytyrës.
Studimet dermatologjike tregojnë se ekspozimi më i lartë ndaj rrezeve UV gjatë muajve të ngrohtë gjithashtu rrit rrezikun e plakjes së parakohshme të lëkurës, hiperpigmentimit dhe dëmtimeve qelizore.
Çfarë duhet të ndryshosh në rutinë?
1. Zëvendëso kremrat e rëndë me formula më të lehta
Në vend të kremrave shumë të yndyrshëm, dermatologët rekomandojnë hidratues me bazë uji (gel-based moisturizers), të cilët hidratojnë pa bllokuar poret.
2. SPF çdo ditë – jo vetëm në plazh
Një nga gabimet më të mëdha është përdorimi i kremit mbrojtës vetëm në pushime. Studime të shumta tregojnë se rrezet UVA depërtojnë edhe përmes reve dhe xhamit, ndaj SPF 30 ose më i lartë duhet përdorur çdo ditë.
3. Pastrues më të butë, por më efektiv
Në verë lëkura prodhon më shumë yndyrë, ndaj pastrimi bëhet më i rëndësishëm. Dermatologët sugjerojnë pastrues me acid salicilik ose përbërës që kontrollojnë sebumin pa e tharë lëkurën.
4. Eksfolim i kontrolluar
Eksfolimi ndihmon në heqjen e qelizave të vdekura dhe parandalon bllokimin e poreve, por nuk duhet teprohet. 1–2 herë në javë është e mjaftueshme.
5. Antioksidantët bëhen “të nevojshëm”
Serumet me vitaminë C ndihmojnë në mbrojtjen kundër dëmeve nga dielli dhe ndotja, duke përmirësuar edhe shkëlqimin e lëkurës.
Sipas dermatologëve, gabimi më i zakonshëm është vazhdimi i të njëjtës rutinë dimërore gjatë muajve të nxehtë.
Kjo jo vetëm që rrit yndyrën dhe aknet, por mund të përshpejtojë dëmtimin nga dielli.
