Ministri i Punëve të Brendshme të Kosovës, Xhelal Sveçla dhe homologu i tij nga Shqipëria, Bledi Çuçi kanë nënshkruar një protokoll i cili pritet të lehtësojë qarkullimin me mjete në të dy anët e kufirit Kosovë-Shqipëri.
Qytetarët e Shqipërisë dhe Kosovës, rezidentë në zonat kufitare, mund të qarkullojnë krejt lirshëm në dy anët e kufirit, në një rreze prej 30 km nga të dy krahët, edhe me mjetet e tyre, në pikat e njohura te kalimit kufitar.
Dy ministrat, theksuan gjatë takimit se qëllimi i këtyre protokolleve është lehtësimi i qarkullimit të shtetasve të të vendeve, pa pasur pengesa burokratike e njëherësh garantimi i sigurisë së të vendeve, për të penguar çdo tentativë aktesh të paligjshme nga individë të caktuar, ka njoftuar Ministria e Brendshme e Shqipërisë.
“Me mikun tim, me Xhelalin, tashmë jemi bërë partnerë gati të një qeverie, sepse takimet janë gjithmonë e më të shpeshta, gjithmonë në të mirë të rritjes së sigurisë së të dy vendeve tona, edhe lehtësimit të lëvizjes së shtetasve të të dy vendeve tona. Ju e dini që unë do të doja të mos kishte marrëveshje fare, ose më mirë, të kishte vetëm një marrëveshje, ku të mos kishte kufij fare, edhe kjo lëvizje e lirë që ne po i mundësojmë banorëve kufitarë, brenda 30 km, të secilit vend, të ishte për të gjithë territorin, qoftë të Kosovës, qoftë të Shqipërisë. Por deri atëherë, meqë jetojmë në Europë, jemi bashkësi e Europës e duhet të respektojmë të gjitha këto marrëveshjet ndërkombëtare në të cilat jemi pjesë, deri atëherë, ne do të bëjmë të pamundurën që shtetasit tanë të qarkullojnë sa më lirshëm”, tha ministri Çuçi.
Ndërsa ministri Sveçla tha se me këtë marrëveshje afrohen jo vetëm institucionet por edhe qytetarët e të dyja vendeve.
“Unë jam i bindur që me këtë, do t’i përafrojmë jo vetëm institucionet por edhe qytetarët e të dy vendeve tona. Kjo nuk do të jetë as marrëveshja e fundit, por do të jetë një vazhdimësi e shumë marrëveshjeve, të cilat i kemi nënshkruar dhe do t’i nënshkruajmë së bashku, deri sa të vijë koha që realisht qytetari i të dy vendeve mos ta dijë se ku ndodhet, apo punon”, deklaroi Sveçla.
