Kryetari i Mitrovicës, Faton Peci, ka njoftuar për një investim prej 1 milion eurosh për zhvillimin e Parkut Industrial në këtë qytet.
Sipas tij, marrëveshja është arritur përmes nënshkrimit të një aneks-marrëveshjeje ndërmjet Komunës së Mitrovicës dhe Ministrisë së Industrisë, Ndërmarrësisë dhe Tregtisë.
Në këtë aktivitet mori pjesë edhe ministrja Mimoza Kusari-Lila.
Sipas njoftimit, investimi do të realizohet në kuadër të projektit për Eko-parkun Industrial në zonën industriale në Frashër, i cili synohet të ndërtohet sipas standardeve evropiane.
Peci theksoi se ky projekt pritet të ketë ndikim të drejtpërdrejtë në zhvillimin e ekonomisë lokale dhe në krijimin e kushteve më të mira për bizneset.
