Ministri në detyrë i Mjedisit, Planifikimit Hapësinor e Infrastrukturës, Liburn Aliu, të mërkurën ka nënshkruar memorandum bashkëpunimi me Komunat e Mitrovicës së Jugut dhe Veriut.
Aliu ka bërë të ditur se është nënshkruar projekti i përbashkët i ndërtimit të dy urave të reja mbi lumin Ibër.
Po ashtu, ai ka thënë se është nënshkruar edhe Memorandum për mbështetje në projekte infrastrukturore mes MMPHI-së dhe të dy komunave.
Sipas Aliut, këto projekte do të lehtësojnë qarkullimin e qytetarëve të të dy komunave dhe do shërbejnë si infrastrukturë në komunikimin dhe bashkëpunimin ndërmjet qytetarëve ‘duke forcuar integrimin social dhe zhvillimin ekonomik në të dy anët’.
“Bashkë me Kryetarin e Mitrovicës së Veriut, Erden Atiq, dhe Nënkryetarin e Mitrovicës, Arian Tahiri, në prani edhe të Kryesuesit të Bordit të Mitrovicës, Elbert Krasniqi nënshkruam Memorandum për mbështetje në projekte infrastrukturore mes MMPHI-së dhe të dy komunave; për një qytet më të lidhur, më funksional dhe më të jetueshëm për të gjithë banorët.
Memorandumin e filluam me nënshkrimin e projektit të përbashkët të ndërtimit të dy urave të reja mbi lumin Ibër, projekte këto që do të lehtësojnë qarkullimin e qytetarëve të të dy komunave dhe do shërbejnë si infrastrukturë në komunikimin dhe bashkëpunimin ndërmjet qytetarëve, duke forcuar integrimin social dhe zhvillimin ekonomik në të dy anët”, ka shkruar ai në Facebook.
