Lajmin e ka bërë të ditur kryetari i komunës së Obiliqit, Xhafer Gashi i cili ka thënë se nënshkrimi i kontratës vjen 6 vjet pasi Kuvendi i Kosovës kishte votuar Ligjin për Obiliqin.
Gashi tha se sot ka nënshkruar kontratën për realizimin e projektit “Koogjenerimi- Shtrirja e rrjetit të sistemit të ngrohjes qendrore në Obiliq”, raporton teve1.info
“Sot, bëhen gjashtë (6) vite prej kur Kuvendi i Republikës së Kosovës ka votuar Ligjin për Obiliqin, një ligj i cili ka krijuar mundësi të shumta për qytetarët e Obiliqit, ndaj pikërisht sot kam kënaqësi të ndaj me ju lajmin se kam nënshkruar kontratën për realizimin e projektit “Koogjenerimi- Shtrirja e rrjetit të sistemit të ngrohjes qendrore në Obiliq”, ka shkruar Gashi.
Tutje ai theksoi se ky lajm i shumë pritur për qytetarët e Obiliqit është vazhdimësi e përpjekjeve për përmisim të kushteve dhe cilësisë së jetesës.
Gashi ka ftuar qytetarët e Obiliqit që më 2 dhjetor në qendër të qytetit të Obiliqit ta vendosin gurthemelin për realizimin e këtij projekti.
“Ju ftoj të gjithëve që me datë 02 dhjetor (e premte) nga ora 14:00 në qendër të qytetit të Obiliqit, bashkë të vendosim gurthemelin për realizimin e këtij projekti!”, ka shkruar ai./teve1.info
