Autoriteti i Aviacionit Civil i Republikës së Kosovës (AAC) ka formalizuar sot nënshkrimin e dy Marrëveshjeve të Punës me Agjencinë e Bashkimit Evropian për Sigurinë e Aviacionit (EASA), duke hapur rrugë për forcimin e bashkëpunimit teknik dhe institucional në fushën e aviacionit civil.
Marrëveshjet janë nënshkruar fillimisht më 3 gusht 2026 nga Drejtori Ekzekutiv i EASA-s, Florian Guillermet, ndërsa sot janë formalizuar nga U.D. Drejtori i Përgjithshëm i AAC-së, Arianit Islami.
Ceremonia e formalizimit është zhvilluar në prani të Ministrit të Infrastrukturës dhe përfaqësuesve të Zyrës së Bashkimit Evropian në Kosovë.
“Këto marrëveshje krijojnë mundësi për bashkëpunim dhe angazhim më të drejtpërdrejtë me EASA-n, përfshirë shkëmbimin e ekspertizës dhe përvojës profesionale, si dhe mbështetje teknike në fusha të ndryshme të sigurisë dhe rregullimit të aviacionit civil”, thuhet në njoftim.
Ky bashkëpunim pritet të kontribuojë në forcimin e kapaciteteve profesionale dhe institucionale të AAC-së, si dhe në zbatimin më efektiv të standardeve evropiane të sigurisë së aviacionit.
Për AAC-në, ky bashkëpunim nënkupton forcim të mëtejshëm të kapaciteteve profesionale dhe institucionale dhe zbatim edhe më efektiv të standardeve evropiane të sigurisë së aviacionit.
Autoriteti i Aviacionit Civil ka shprehur mirënjohje për EASA-n, Komisionin Evropian, Zyrën e BE-së në Kosovë, Ministrinë e Infrastrukturës, institucionet e Kosovës dhe industrinë e aviacionit për bashkëpunimin dhe mbështetjen e vazhdueshme.
