Tre persona kanë humbur jetën si pasojë e asfiksimit nga tymi pas një zjarri që ka shpërthyer në një banesë në Malishevë.
Nënkryetari i Komunës së Malishevës, Vesel Krasniqi, bëri të ditur se viktimat janë babai me dy fëmijët e tij, një vajzë dhe një djalë.
“Fatkeqësisht sot, si pasojë e asfiksimit nga zjarri në banesën e tyre, kemi tri viktima: babai me dy fëmijë, vajzë dhe djalë. Sapo kemi marrë informacionet, policia, urgjenca dhe të gjitha njësitë përkatëse kanë dalë në vendin e ngjarjes. Stafi mjekësor ka bërë të pamundurën, por në momentin e njoftimit ka qenë ndoshta edhe vonë dhe janë gjetur pa shenja jete”, tha ai.
Ai shtoi se të gjitha institucionet relevante janë angazhuar menjëherë për trajtimin e rastit.
“Tash policia, hetuesia dhe prokuroria janë duke e kryer punën e tyre. Ne lutemi dhe kërkojmë që sa më shpejt të zbardhet rasti, si ka ndodhur. Ajo që është me rëndësi është se të gjitha organet kanë qenë në vendin e ngjarjes në kohën e duhur, por fatkeqësisht ka qenë e pamundur të shpëtohen tri jetë”, u shpreh Krasniqi.
Krasniqi shprehu ngushëllime për familjen e viktimave edhe në emër të kryetarit të komunës.
“Unë, në emrin tim personal dhe të kryetarit Kastrati, si dhe në emër të gjithë qytetarëve të Komunës së Malishevës, i shprehim ngushëllimet më të sinqerta familjes Berisha. Kryetari aktualisht është i shtrirë për trajtim mjekësor, por besojmë se shumë shpejt do të rikthehet”, tha ai.
Sipas tij, shkaku i saktë i zjarrit ende nuk dihet, ndërsa dyshimet e para lidhen me asfiksimin nga tymi.
“Hetuesia është duke e kryer punën e vet dhe ne nuk kemi kompetenca të japim detaje të tjera. Ajo që dihet deri tani nga stafi mjekësor është se bëhet fjalë për asfiksim nga tymi që është shkaktuar nga zjarri në banesë”, përfundoi Krasniqi.
