Një ankesë për djalin e saj që po shkollohet në këtë shkollë ka ngritur të premten mbrëma, Valbona Krasniqi.
Kjo nënë ka pretenduar se 11 vjeçari po bullizohet, rrahet, shantazhohet, ofendohet, kërcënohet me armë të ftohta nga nxënësit tjerë të shkollës “Abdullah Shabani”.
Pretendimet e saj, ajo i ka publikuar në profilin e saj në Facebook, ku ka
treguar se është nënë vetushqyese dhe se këto shqetësime për djalin e saj i ka ngritur te drejtori i shkollës, kujdestarja e klasës dhe te prindërit e fëmijëve që pretendon se po shkaktojnë dhunë ndaj tij.
“Edhe pasi është vendos djali im në paralele tjetër, po i njejti fëmijë problematik me disa fëmijë të tjerë kanë shkuar në paralele ku është djali im dhe kanë ushtru dhunë fizike! Djali nuk ka shkuar sot në shkollë ( e që nuk është e para herë që mungon shkaku i frikës) nga të vjellurat,temperatura dhe traumat e shkaktuara nga këta bashkëmoshatar të tij”, ka shkruar jo në Facebook.
Por, të shtunën drejtori i kësaj shkolle Nazmi Beka tha për Tëvë1 se këto pretendimet nuk qëndrojnë dhe se janë të gatshëm për bashkëpunim rreth rastit.
“Ne i demantojmë në plotni pretendimet e zonjës në fjalë i bëjmë thirrje të bashkëpunoi me ne. Ne do jemi gjithmonë përkrahës të secilit nxënës e në mënyrë të veçantë nxënësit për të cilin po bëhet fjalë pa marrë parasysh specifikat që i ka secili nxënës”, tha Beka.
Beka shtoi se gjatë ditës kanë mbajtur mbledhje të jashtëzakonshme me Drejtorinë e Arsimit në Mitrovicë dhe Policinë.
“Ne kemi mbajtur mbledhje urgjente me këshillin e mësimdhënësve për ta trajtuar edhe njëherë gjithë procesin në takim kanë qenë edhe Drejtoria e Arsimit dhe përfaqësues të policisë së Kosovës”, tha ai.
Për rastin kanë filluar hetimet.
“Bazuar në kompetencat dhe autorizimet policore në koordinim edhe me institucionet relevante për trajtimin e të miturve Policia ka filluar të trajtojë këtë rast”, thuhet nga Policia e Kosovës.
Drejtoria e Arsimit në Mitrovicë kanë thënë përmes rrjetit social facebook se gjatë ditëve në vijim do të takohen me nënën e nxënësit.
Kjo e fundit përmes një reagimi ka bërë të ditur se me avokatin e saj do të procedojnë më tutje rastin.
Televizioni ka tentuar të flasë më gjerësisht gjatë ditës me Krasniqin, porse kjo ka qenë e pamundur.
Reagim ka pas edhe nga ministrja e Arsimit, Arbërie Nagavci e cila ka kërkuar zbardhjen e rastit.
