Fondacioni “Përkrahje për Mbrojtjen Juridike të Hashim Thaçit” ka publikuar një fotografi dhe një mesazh dedikuar nënës së ish-presidentit të Kosovës, Hyrë Thaçit, e cila ka mbushur 88 vjet.
Në njoftim, fondacioni thekson pritjen emocionale të nënës Hyrë për të marrë urimin nga djali i saj, Hashim Thaçi, i cili tash e pesë vjet ndodhet në paraburgim në Hagë.
“Nëna Hyrë që mbushi 88 vjet, me padurim e priti urimin e djalit të saj, Hashimit, i cili në këto pesë vjetët e fundit e uroi vetëm përmes telefonatave apo videolidhjeve nga burgu i Hagës”, thuhet në postimin e fondacionit.
Në mesazh, përveç ndjesive personale, theksohet edhe krenaria e saj për të birin, duke e cilësuar atë si një figurë historike.
“Ajo nuk është vetëm nëna e një burguari, por nëna e një lideri që ka bërë histori dhe për të cilin krenaria mbetet e palëkundur. Ajo është shumë krenare për djalin e saj dhe pret që së shpejti të kthehet në shtëpi e të festojnë së bashku”, vijon njoftimi.
Postimi përmbyllet me thirrjen: “Liri për çlirimtarët!”.
