Në këtë vend para 26 viteve, Leonora Rexha ndau rrugën përgjithmonë me bashkëshortin e saj.
Me 7 maj të vitit 1999, familjen e Leonorës si dhe shumë familje tjera në Gjakovë forcat serbe i detyruan që të braktisin shtëpinë.
Në vendin e njohur si Ura e Taliqit, burrat i ndanë nga gratë, e në mesin e tyre ishte edhe burri i Leonorës, Astrit Rexha.
Fjalët e fundit të bashkëshortit, Rexha nuk i harron asnjëherë.
“Çiken e vogël e ka pasur në krah bashkëshorti dhe me ka thanë Nore, amanet vajzat edhe i ka dalë një pikë lot, kam nejt iu kam lut Policisë me ma leshu bashkëshortin me kanë thënë sa me shpejti me largu”, tregon ajo.
Krismat e armëve, Leonora edhe pas 26 viteve i ka ende në vesh.
“Unë i kam lanë të gjallë krejt këtu në urën e Taliqit edhe i kanë dërguar në këtë xhaminë edhe thonë prej shpijave që kanë parë që burri jem e ka qelë derën edhe aty i kanë vrarë i kanë pushkatuar krejt. Krismat i kam dëgjuar unë, pasi kam shkuar të daja i burrit por unë kam bërë gjumë me sy atë natë që e kam ditë që kam më mu vra burri”, rrëfen Lenora Rexha për Tëvë1.
Për këtë krim të kryer nga data 7 maj deri me maj 1999, Gjykata Themelore në Prishtinë, ka lëshuar urdhërarrest ndaj Milan Radoiçiqit dhe 19 serbëve të tjerë për krime lufte.
“Prokuroria Speciale e Republikës së Kosovës në kërkesë ka cituar se me datë 18.03.2025 ka nxjerr aktvendim për fillimin e hetimeve ndaj të pandehurve për shkak të dyshimit të arsyeshëm”, thuhet nga Gjykata Themelore në Prishtinë
E këtij lajmi iu gëzua edhe Rexha e cila pret që të vihet drejtësia për të gjitha krimet e kryera nga Serbia.
“Duhet me dal drejtësia gjithqysh jo vetëm për burrin temë por për krejt çka janë të vrarë, ka trupa që hala nuk i kanë gjet. Ata kanë qenë me maska të armatosur deri në dhomë, thonë që krejt të Gjakovës kanë qenë”, shprehet ajo.
Ndaj, Milan Radoiçiqit me 11 shtator 2024 ishte ngritur gjithashtu bhë aktakuzë për sulmin terrorist në Banjskë të Zveçanit.
