Të martën, në veri të Mitrovicës, qytetarë dhe punonjës të mirëmbajtjes së varrezave kanë hasur në eshtra (mbetje mortore), që potencialisht mund t’u përkasin viktimave të luftës.
Lajmin e ka bërë të ditur Komisioni Qeveritar për Persona të Zhdukur, përmes një postimi në Facebook.
Siç thuhet në njoftim, informacioni është raportuar menjëherë në Policinë e Kosovës dhe, pas verifikimit fillestar e konstatimit nga eksperti mjeko-ligjor, janë ndërmarrë procedurat për tërheqjen e mbetjeve mortore.
“Sot, më 28 tetor 2025, qytetarë dhe përgjegjësit e mirëmbajtjes së varrezave, në veri të Mitrovicës, kanë hasur në eshtra (mbetje mortore) që potencialisht mund t’iu përkasin viktimave të luftës. Informacioni është raportuar menjëherë në Policinë e Kosovës. Pas marrjes së informacionit, në vendngjarje ka dalë ekipi i përbashkët i përbërë nga Komisioni Qeveritar për Personat e Zhdukur, Drejtoria për Hetimin e Krimeve të Luftës dhe Instituti i Mjekësisë Ligjore. Ekipi ka bërë verifikimin fillestar, dhe pas konstatimit nga eksperti mjeko ligjor, janë ndërmarrë procedurat për tërheqje”, bëhet e ditur në njoftim./teve1.info/
