Në një objekt katër katësh deri të mërkurën ka operuar Ministria për Kulturë, Rini dhe Sport e strukturave paralele serbe në veri të Mitrovicës.
Inspektorët komunal të Mitrovicës së Veriut të asistuar nga Policia e Kosovës ia vunë drynin këtij dikasteri me veprimtari ilegale dhe ia kthyen komunës këtë pronë.
Aty operonin Institucioni për sport, rini dhe shërbime të specializuara, Lidhja Sportive dhe Shoqëria Kulturore-Artistike “Kosovski bozur”.
Këtë e ka konfirmuar zëvendësdrejtori i Policisë për rajonin e veriut, Veton Elshani.
Aksion të ngjashëm Policia e Kosovës pati edhe të martën. Ata mbyllën kompaninë rajonale të ujësjellësit “Ibar” e cila ka funksionuar sipas sistemit paralel serb.
Veriun me ujë do ta furnizojë kompania rajonale e Ujesjellesit KRU Mitrovica, e cila të martën me asistencë të policisë e mori nën menaxhim këtë objekt.
Ish-drejtori i Kompanisë paralele serbe, “Ibar” Zoran Vučinić nuk pranoi të fliste para kamerës ngjashëm si punonjësit. Ai tha se nuk ka informacione për këto veprime.
Ndërkaq kryeshefi i KRU Mitrovica, Bashkim Kurti thotë se së shpejti do të hapet konkurs për pozitat vakante, për çka mund të aplikojnë edhe komunitetit serb.
Në anën tjetër, kryesuesi i Kuvendit komunal të Mitrovicës së veriut, Nexhat Ugljanin thotë se pritet të mbyllen edhe disa institucione paralele serbe.
Për funksionimin e këtyre objekteve paralele serbe ka raportuar Tëvë1 muaj më parë.
