Fëmijë e të rritur u mblodhën të enjten në sheshin e Suharekës.
E këtu erdhën edhe pjesëtarë të KFOR-it, e udhëheqësit e komunës.
Krejt kjo për të shënuar ditën e personave me sindromën Daun.
E këtë vit, fëmijët po shënojnë këtë ditë përmes pikturimit.
I gjithë ky organizim, sipas organizatores Driana Elshani Selimi, u bë me një qëllim.
“Është ajo farë te ne, ajo frika që e kam një familjar me sindromen daun, duhet me mshefe duhet me mbajte të mbyllur dhe mos me ekspozu, dhe kjo është krejtësisht e gabuar, se secili prej neve është i ndryshëm, është unik në botën e tij. Edhe personat me sindromën Daun janë shumë të dashtun janë shumë veçantë, dhe e plotësojnë atë portretin që japin fëmijët”, tha ajo.
E mbështje për këta fëmijë, premtuan nga Ministria e Arsimit në Suharekë.
“Këta persona janë pak më të veçantë, por kanë talent sikurse ne, dinë më këndu, me vizatu, me mësu dhe janë përfaqësues të denjë të shoqërisë tonë. Ne si institucione do t’i kushtojmë rëndësi këtyre kategorive që kanë nevojë”, tha Remzi Bajselmani, drejtor i Arsimit në këtë komunë.
Një rol të rëndësishëm për këta fëmijë, sipas drejtoreshës së shëndetësisë në Suharekë, kanë prindërit.
“Këta fëmijë nuk do të ishin këtu pa qenë këta prindër, puna më vështirë bëhet nga prindërit të cilët asnjëherë nuk dorëzohen e nëse këta nuk dorëzohen as ne nuk do të dorëzohemi”, ka thënë Besa Kuqi, drejtoreshë e Shëndetësisë në Suharekë.
Aktiviteti që u mbajt në sheshin e Suharekës, u përkrah financiarisht nga Komuna e Suharekës dhe disa kompani private.
