Mjekët e Repartit të Urologjisë në Spitalin e Përgjithshëm “Dr. Sami Haxhibeqiri” kanë kryer me sukses një ndërhyrje të ndërlikuar kirurgjikale, duke larguar disa gurë me përmasa të mëdha nga sistemi urinar i një pacienti 54-vjeçar.
Sipas njoftimit të spitalit, pacienti me inicialet B.S. iu nënshtrua një operacioni gjatë të cilit u hoqën tre gurë të mëdhenj. Njëri prej tyre ndodhej në fshikëzën urinare dhe kishte përmasa rreth 7.5 centimetra, tjetri ishte i lokalizuar në ureter me madhësi afërsisht 4 centimetra, ndërsa guri i tretë ishte në veshkë dhe arrinte madhësinë prej 1.5 deri në 2 centimetra.
Pas trajtimit dhe monitorimit në repart, pacienti është liruar nga spitali në gjendje të mirë shëndetësore.
Sipas njoftimit, ndërhyrja konsiderohet një nga rastet më sfiduese të trajtuara së fundmi në këtë repart për shkak të përmasave të gurëve të larguar. /teve1.info/
