47 lokacione të ndryshme, në Prishtinë, Pejë, Suharekë e Gjilan, u bën cak i një operacioni të madh policor.
Me emrin e koduar “Qielli i thyer”, operacioni antidrogë, pati në fokus një grup të krimit të organizuar të trafikimit me narkotikë, ku për pasojë u arrestuan 22 persona.
Në aksion u angazhuan plot 600 zyrtarë policorë, të cilët kishin edhe ndihmën e autoriteteve të Belgjikës, Holandës dhe të Europol-it.
E 22 të arrestuarit dyshohen për kryerjen e veprave penale “krim i organizuar në lidhje me trafikim të narkotikëve”, si dhe për “pastrim të parave”.
Prokuroria Speciale njoftoi se operacioni është rezultat i hetimeve që kanë nisur prej kohësh, dhe janë të bazuara në disa komunikime të përgjuara përmes aplikacionit telefonik “SKY ECC”.
“Gjatë realizimit të urdhër kontrollit në këto lokacione është gjetur dhe sekuestruar sasi e konsiderueshme e provave materiale, dhe pasurive të specifikuara duke përfshirë: lëndë narkotike, 129 vetura, 134 mijw e 900 euro para të gatshme, 20 mijë e 40 franga zvicerane, 490 dollarë, 13 mijë euro para të falsifikuara, 9 orë dore të markave të njohura, 36 armë të llojeve të ndryshme, 1569 fishekë të ndryshëm, 1292 copë municione të ndryshme, një prese për paketimin e heroinës dhe kokainës, laptopë, telefona, usb dhe dokumente të ndryshme”, thuhet nw grafinë e Prokurorisë Speciale.
Përpos këtyre provave materiale, të dyshuarve u janë ngrirë rreth 500 mijë euro mjete në llogari bankare, si dhe për pasuritë e paluajtshme të 22 të arrestuarve, është vënë urdhër ndalues.
Të dyshuarit gjithashtu dyshohet të jenë të përfshirë në trafikim ndërkombëtar të narkotikëve.
Aksioni i sotëm është një prej operacioneve më të mëdha të autoriteteve kosovare kundër narkotikëve.
