Puna nisi në vitin 2019.
E pesë vjet më vonë, dyert u hapën për besimtarët.
Kështu të dielën, Zhegra e Gjilanit u bë me xhami të re.
Në ceremoninë e hapjes, përveç krerëve të BIK, u pa edhe i pari i Gjilanit, Alban Hyseni.
E në ditën e parë, nuk mungoi as xhemati.
Hapja e xhamisë në prag të muajit të Ramazanit, sipas myftiut Naim Tërnava, e bën këtë ngjarje edhe më të veçantë.
“Kjo xhami, do të reflektoj sikur të gjitha xhamitë e tjera, vetëm dritë, do të dhurojë moral, do të dhurojë vëllazëri, do të dhurojë cdo gjë që shkon në shërbim të drejtë e të mirë të individit, familjes dhe shoqërisë”, u shprehë Tërnava.
I lumtur që banorët e Zhegrës tani kanë një vendfalje, u shpreh edhe kryetari i Gjilanit, Alban Hyseni.
“Në prag të muajit të shenjtë të Ramazanit, kur hapen dyert e meshires dhe ne sakrifikojmë shumë nga vetja, është mesazh i mirë që gjitha obligimet që i kemi si mysliman, t’i përmbushim në një vend të tillë, që reflekton përtej bukurisë”, tha Hyseni.
Ndërkohë falënderime për të gjithë ata që kontribuan në ndërtimin e kësaj xhamie, patën nga këshilli i BIK-ut në Gjilan.
“Padyshim që puna për këtë xhami ju ka shtyrë që besimin që e keni ndaj Allahut, të jepni kontribut, ta ndërtoni e ta sillni në këtë gjendje ku ne sot e shohim, që jo vetëm në Gjilan, por edhe me gjerë, është xhamia më e bukur në Anamoravë, se paku”, tha Naim Aliu, kryetar i KBI-së në Gjilan
Xhamia e ndërtuar nga besimtarët nga vendi e diaspora, sipas Bashkësisë Islame të Kosovës, ka koston e mbi gjysmë milioni euro.
