Në mbledhjen komemorative për nder të Flora Brovinës, ka folur edhe Bajrush Xhemajli, përfaqësues i Shoqatës së të Burgosurve Politikë dhe Shoqërisë “Lëvizja”
Xhemajli ka vlerësuar figurën e Brovinës, duke thënë se ajo lidhet me dinjitetin, qëndresën dhe sakrificën, ndërsa ka kujtuar edhe periudhën e burgosjes së saj.
“ Në emër të Shoqatës të të Burgosurve Politikë kam nderin të them disa fjalë për doktoreshë Florën, një emër që lidhet me dinjitetin, qëndresën dhe sakrificën. Përsëri për veprimtarin e saj patriotike çlirimtare, Flora u arrestua e u burgos dhe u dënua me 12 vjet burg. Prandaj, edhe kalvari i vuajtjeve të saj ishte pa fund. Ndarja e largët e fëmijëve e familjes në qelitë e ftohta të burgjeve të Kosovës e pastaj transferimit në burgjet serbe, njëherë në Pozarevac e pastaj në Nish. Në këto burgje, siç do të dëshmojë edhe vetë pas çlirimit të saj, u mbajt e izoluar pjesën më të madhe të kohës së dënimit. Megjithë këto rrethana të krijuara, doktoresha gjeti kurajnë për të përballuar stoikisht krejt vuajtjet fizike e shpirtërore, pa u trembur e me dinjitet. Nuk lejoi që burgu ti thyejë shpirtin, përkundrazi, vuajtja e forcoi karakterin e saj. Ajo ishte e vetëdijshme se ishte në qeli jo pse kishte bërë krim, por pse i është mohuar liria si shqiptare, për shkak të bindjeve të qëndrimeve të saj ndaj okupatorit. Pas çlirimit, u bë amnestia e të burgosurve dhe edhe doktoresha Flora u lirua”, u shpreh Xhemajli.
Varrimi i Flora Brovinës bëhet sot (18 shtator) në Arbëri në Prishtinë, në orën 16:00.
