Ka përfunduar mbledhja e Komisionit për Administratë Publike, Pushtet Lokal, Media dhe Zhvillim Rajonal, ku kanë vazhduar për të tretën herë raportimin anëtarët e Komisionit të Pavarur të Mediave.
Kryetari i Komisionit, Valon Ramadani njoftoi se mbledhja e radhës do të caktohet kurdo që materialet do të përkthehen dhe nëse do të ketë materiale të tjera.
Në fillim të mbledhjes, deputeti i LDK-së, Agim Veliu kërkoi që të përkthehen të gjitha materialet e dorëzuara te deputetët.
Ai tha se materialet nuk janë në gjuhën shqipe dhe se për këto dokumente nuk është i gatshëm të japë qëndrim.
Deputeti i LVV-së, Salih Zyba pyeti se pse ka ardhur në këtë formë materiali.
Isak Shabani, deputet i PDK-së, u pajtua që materiali të përkthehet. Ai kërkoi nga Kryetari i KPM-së se cilat janë arsyet që janë hijezuar materiale të ndryshme që janë dorëzuar nga KPM.
Jeton Mehmeti, kryetar i Bordit të KPM-së, në lidhje me materialet e dorëzuara, tha se janë të dhënat bazike që janë dy kompani që kanë lidh marrëveshje ndërmjet tyre.
“Ajo çka nuk e shohim as ne si KPM janë të dhënat komerciale të dy kompanive, që në bazë të njohurive që i kemi, janë të mbrojtura me ligj”, ka thënë Mehmeti, raporton Betimi për Drejtësi.
Në lidhje me kërkesën për t’u përkthyer materialet në gjuhën shqipe, Kryetari i Komisionit për Administratë, Valon Ramadani kërkoi që të procedohet me shqyrtim të çështjeve të materialeve që janë në gjuhën shqipe.
Ramadani, kërkoi nga administrata e Kuvendit që të angazhohet në përkthim të menjëhershëm aty për aty.
Deputeti Veliu tha se deputetët duhet t’i marrin materialet në gjuhën zyrtare dhe se materialet duhet t’i kenë para se të nisë diskutimi. Ai tha se nëse nuk është në gjendje administrata të sigurojë materialet, nuk do të jetë pjesë e kësaj mbledhje.
“Kjo mbledhje është e papërgatitur dhe në këtë formë nuk duhet të marrë pjesë”, tha ai.
Në fund, deputeti i AAK-së, Besnik Tahiri kërkoi që Komisioni për Administratë të mblidhet në një ditë të vetme dhe ta kryejë këtë dëgjim mbikëqyrës dhe të ecet më tutje.
