Siguria në Lipjan është rritur ndjeshëm.
14.7% vepra penale më pak u raportuan në vitin 2025, në krahasim me vitin 2024.
Kjo u bë e ditur në prezantimin e raportit vjetor të Stacionit Policor të këtij qyteti.
Megjithatë, viti s’u kalua pa sfida.
“Gjithashtu sfidë në vete ka qenë edhe sezoni veror i vitit 2025. Ku përveç angazhimeve të shumta jemi ballafaquar edhe me zjarret e natyrës së ndryshme në shumë lokacione. Ne kemi marrë masat e duhura në kuptimin e pozitimit penal edhe në disa raste që i kemi dërguar në procedurë edhe në prokurori”, tregoi komandanti i Stacionit Policor në Lipjan, Brahim Shatrolli.
E shifrat e vitit 2025, për drejtorin rajonal të Policisë në Prishtinë, janë impresionuese.
“Kjo tregon për sigurinë në Komunën e Lipjanit dhe angazhimin e zyrtarëve policorë të Stacionit Policor në Lipjan. Vetëm numri i tiketave ishte në rënie që komandanti po më duket ish bë merak, po komandant falë angazhimit të juaj në parandalim, falë angazhimit të juaj në vetëdijesim dhe vetëdijesimit të qytetarëve tregon uljen edhe të tiketave dhe kjo tregon se Policia e Kosovës nuk është vetëm për me shqiptua dënime”, deklaroi drejtori i DRP-së në Prishtinë, Basri Shabani.
Për rritjen e sigurisë dhe punën e policisë, patën falënderime nga pushteti lokal.
“Me të vërtetë është një kënaqësi kur e shohim një raport me plotë numra dhe plotë statistika që në vete bartin punën, përkushtimi, gatishmërinë dhe aktivitetet e zyrtarëve policorë, që janë një reflektim i rezultateve të punës nga tereni që janë reflektuar në një raport përmbledhës që me të vërtetë, ne, të gjithëve na bënë krenarë bazuar në numrat që pamë”, deklaroi nënkryetari i Komunës, Dimant Bytyqi.
E përgjatë vitit të kaluar, pati edhe rritje të informacioneve inteligjente, të cilat raportohen nga vet zyrtarët policorë.
“Në vitin 2024, 959, në vitin 2025, 1326 apo 38.3% më shumë. Edhe këtu ka qenë rezultat jashtëzakonisht i mirë për të cilën përgëzojë gjithë stafin që janë angazhuar në këtë drejtim”, tha komandanti i Stacionit Policor në Lipjan, Brahim Shatrolli.
Në raport u tha se sfidë për stacionin policor të Lipjanit mbetet mungesa e personelit të eprorëve, si dhe mungesa e pajisjeve teknologjike.
Në fund të prezantimit, u ndanë mirënjohje për policët e dalluar, si dhe për institucionet bashkëpunuese.
