Kryeministri në detyrë, Albin Kurti, ka vendosur sot gurthemelin e një shkolle të re fillore e pra në gjuhën shqipe, për fëmijët në Lagjen e Boshnjakëve në Mitrovicë të Veriut.
Në kuadër të projektit, i cili kap vlerën e 4 milionë e 152 mijë eurove, do të ndërtohen nëntë klasë për arsimin fillor dhe një klasë për çerdhen e fëmijëve.
Kurti ka bërë të ditur se objekti do të ketë edhe bibliotekë, sallë të arsimtarëve dhe kabinete të posaçme, për të ofruar kushte moderne për mësimdhënie e mësimnxënie.
Sipas Kurtit, punimet do të zgjasin 18 muaj dhe shkolla pritet të hapë dyert në pranverën e vitit 2027.
“Po vendosim gurthemelin e shkollës së re fillore dhe të çerdhes për fëmijë. Do të jenë nëntë klasë të shkollës fillore dhe një klasë për çerdhe të fëmijëve, me ç’rast do të ketë edhe bibliotekë, sallë të arsimtarëve, kabinete e kështu me radhë në mënyrë që kushtet të jenë moderne për mësimdhënie sa më të mirë dhe po ashtu për mësimnxënie me standardet më të larta. Kostoja e gjithë mbarshme është rreth 4 milionë e 152 mijë euro, me ç’rast punimet do të kryhen për 18 muaj, pra për një vit e gjysmë që do të thotë se do t’ia premë shiritin kësaj shkolle në Lagjen e Boshnjakëve në pranverën e vitit 2027”, deklaroi Kurti.
Ndërkohë, në vendosjen e gurthemelit të shkollës të pranishëm ishin, ministri në detyrë i Punëve të Brendshme, Xhelal Sveçla, ministrja në detyrë e Arsimit, Arbërie Nagavci dhe kryetari i komunës, Erden Atiq. /teve1.info/
