Shehu tha se këtë kërkesë e ka bërë në përkujtim të 27 prillit 1999, ku në Mejë të Gjakovës, ndodhi masakra më e madhe gjatë luftës në Kosovë.
Sipas tij pa u dënuar krimet e genocidin serb në Kosovë e Rajon dhe pa kërkuar falje për ato, nuk mund të sigurohet një e ardhme evropiane.
“Sot është përvjetori i masakrës së Mejës pranë Gjakovës, realizuar nga forcat dhe paraushtaraket serbe, ku u vranë mizorisht 377 burra dhe fëmijë kosovarë. Fatkeqësisht ky akt kriminal nuk është i vetëm, por i paraprirë dhe pasuar edhe me të tjerë të këtij lloji, duke përbërë kështu një vepvr genocidi të Serbisë ndaj popullësisë së Kosovës, akte këto për të cilat qeveria e atij vendi nuk ka kërkuar kurrë të falur”, ka shkruar Shehu në Facebook.
Tutje ai tha se në seancën e radhës plenare në Kuvendin e Shqipërisë duhet të mbahet një minut heshtje në përkujtim të viktimave.
“Dorëzova një kërkesë në protokollin e Kuvendit. Sot është dita e përvjetorit të masakrës, në Kosovë, ku u masakruan burra dhe gra nga ushtria serbe. Për këtë arsye mendoj se kemi të bëjmë me një gjenocid ndaj popullsisë së Kosovës. Fatkeqësisht qeveria e Serbisë nuk ka kërkuar falje asnjëherë për këtë krim dhe për këtë gjenocid. Unë sot i kam kërkuar kryetares kuvendit, zonjës Nikolla që të mbahet 1 minutë heshtje për respekt të viktimave në Mejë dhe të dënojmë gjenocidin e Serbisë ndaj popullit të Kosovës”, tha deputeti i Partisë Demokratike.
