Me 16 shtator, sytë e gjithë shqiptarëve do të drejtohen nga Haga.
Kjo meqë Gjykata Speciale, e caktoi këtë datë, për shpalljen e aktgjykimit në rastin më të madh të saj.
Por, fillimisht vendimi në rastin “Thaçi dhe të tjerët” ishte paraparë të shpallej me 16 korrik.
Por të mërkurën, Dhomat e Specializuara bën të ditur se i duhen edhe dy muaj të tjerë për të marrë një vendim.
“Trupi Gjykues shpjegoi se koha e nevojshme për kuvendimet ishte zgjatur në përputhje me Rregulloren, për shkak të vëllimit të madh të provave të marra dhe kompleksitetit të procesit gjyqësor, dhe se kjo zgjatje përligjej nga nevoja për të bërë një vlerësim të arsyetuar, tërësor dhe të drejtë të dokumentacionit të çështjes”, shkruhet në vendimin e trupit gjykues.
Me këtë vendim të gjykatës, nuk po pajtohen në Organizatën e Veteranëve të Luftës.
Kryetari i OVL të UÇK-së, Hysni Gucati e vlerësoi këtë vendim si të papranueshëm.
“Për ne është e papranueshme dhe me keqardhje them këtë që e ka bërë gjykata speciale, është më shumë instrument i politikës sesa i drejtësisë dhe për këtë arsye i kemi frikët tona dhe shqetësimet”, theksoi Gucati.
Edhe njohësit e ligjit në Kosovë, Ardian Bajraktari, thonë se ky vendim i Speciales është në kundërshtim me të drejtat e njeriut.
“Nga fillim-prilli që shkoj në shkëputje me çdo parametër ligjor dhe në kundërshtim edhe me praktikën e Gjykatës Evropiane për të Drejtat e Njeriut, por me aq sa është parë, prokuroria nuk ka arritur për t’i argumentuar tezat e saj”, vlerësoi Bajraktari.
Ndryshe, ish-katërshja e UÇK-së po vazhdon të mbahet në paraburgim që nga viti 2020.
Mbi ta, rëndojnë akuzat e pretenduara për krime lufte nga Prokuroria Speciale e Hagës.
