Në kërkim të fatit të të pagjeturve – Për të katërtën ditë vazhdojnë gërmimet në Kalludër të Zubin Potokut
Për katër ditë me radhë, kjo rrugë është kthyer në destinacionin kryesor të ekipeve hetimore.
Kjo pasi në këtë zonë, që nga e marta, po zhvillohen gërmime në kërkim të mbetjeve mortore të luftës së fundit në Kosovë.
Ndonëse terreni është i vështirë dhe qasja nuk është e lehtë, ekipi i Tëvë1 edhe të premten ndoqi nga afër gërmimet që po zhvillohen në fshatin Kalludër e Vogël, në komunën e Zubin Potokut.
Deri më tani dyshohet se janë gjetur disa mbetje mortore.
Të premten, njëjtë sikurse ditëve të tjera, të pranishëm në këtë lokacion ishin edhe zyrtarë të Policisë së Kosovës dhe ata të EULEX-it.
Megjithatë, dita ishte më e qetë dhe nuk pati vizita nga krerët e institucioneve.
Megjithëse deri më tani nuk ka një konfirmim zyrtar nga institucionet përgjegjëse, dyshimet e para janë se pranë përroit ndodhet një varrezë e mundshme masive.
Në këtë lokacion dyshohet se trupat e viktimave u fshehën pas ekzekutimit në prill të vitit 1999.
Se në këtë zonë kishte dyshime për një varrezë masive, e thotë edhe ish-kryetari i Zubin Potokut, Izmir Zeqiri.
“Në lidhje me këtë ngjarje, Prokuroria Speciale ka arrestuar dy persona të nacionalitetit serb, ndaj të cilëve është caktuar masa e paraburgimit prej një muaji”, tha Zeqiri.
Dyshimet janë se pikërisht këtu, 27 vite më parë, u krye një nga krimet më të rënda të luftës në Kosovë.
Forcat serbe dyshohet se ekzekutuan 23 intelektualë nga Mitrovica, të cilët më pas u zhdukën me qëllim të fshehjes së gjurmëve të krimit.
