Dy persona me inicialet I.M., dhe B.M., janë arrestuar nga Policia e Kosovës, pasi që të njëjtit dyshohet se kanë kryer veprën penale “Marrje ryshfeti në sektorin privat” dhe “Bashkëryerja”.
Të dyshuarit janë kontrolluar nga njësia policore në një autoshkollë në Prishtinë, nën dyshimin e bazuar se pronari i saj në këmbim të parave ua kryen provimet teorike dhe praktike për patentë shofer kandidatëve të interesuar.
Policia gjatë kontrollit ka gjetur dhe sekuestruar si prova materiale pesë folder me kopje të testeve që dyshohet se janë të njëjta me teste për patentë shofer, një folder me të dhënat e kandidatëve si dhe dy pajisje që janë përdoruar nga të dyshuarit për komunikim në largësi.
Në konsultim me prokurorin kompetent, pas intervistimit ndaj të dy personave të dyshuar është lëshuar aktvendimi për ndalim 48 orë dhe të njëjtit janë dërguar në mbajtje.
