Në seancën gjyqësore që po zhvillohet lidhur me rastin e njohur si “400 kilogramë kokainë”, janë prezantuar pamjet e ditës kur në kompaninë “MCFOOD” kishte ndërhyrë Policia e Kosovës dhe ishte gjetur sasia e substancës narkotike.
Pamjet e shfaqura para trupit gjykues tregojnë momentin e mbërritjes së policisë në ambientet e kompanisë dhe vendin ku ishte zbuluar ngarkesa me drogë.
Avokati i të akuzuarit Izet Sheqiri, Korab Sejdiu, komentoi këto pamje duke theksuar se paleta ku ishte gjetur substanca narkotike nuk ishte prekur para ndërhyrjes së policisë.
“Po e shihni që edhe paleta në fjalë, ku ka qenë substanca narkotike, nuk është prekur as nuk është hapur, dhe kjo ka ndodhur vetëm pas ndërhyrjes së policisë. Fakti që nuk janë marrë fare me këtë ngarkesë, nga e cila njerëzit e arsyeshëm do të mundoheshin ta hiqnin nga dispozicioni, është provë shtesë që për të gjithë të akuzuarit këtu dhe për kompaninë ‘MCFOOD’, në atë paletë nuk ka pasur asgjë tjetër përveç produkteve ushqimore që i kanë porositur,” tha avokati Sejdiu.
Seanca pritet të vazhdojë me shqyrtimin e provave të tjera që lidhen me rastin.
