300 të burgosur nga Danimarka, do e vuajnë dënimin në burgun e Gjilanit.
Por, këta të burgosur do të jenë nën mbikëqyerje të stafit kosovar, krahas atij danez.
“Shumica e stafit do të jenë anëtarë të stafit lokal të punësuar në Burgun e Gjilanit. Stafi danez që do të angazhohet në këtë institucion do të veprojë sipas kushteve dhe rregullave të punës së Danimarkës dhe do të paguhet nga Danimarka. Afërsisht rreth 20 anëtarë të stafit do të jenë nga Danimarka”, thonë nga Ministria e Drejtësisë.
Por sipas njohësit të sigurisë, Nuredin Ibishi, do të jetë sfiduese diskrepanca në kushte mes stafit kosovar dhe atij danez.
Marrëveshja e Republikës së Kosovës dhe Mbretërisë së Danimarkës, ani pse u arrit vitin e kaluar, ajo ende nuk është e gatshme për t’u nënshkruar.
“Marrëveshja ndërmjet Republikës së Kosovës dhe Mbretërisë së Danimarkës për transferimin e të burgosurve pritet të nënshkruhet së shpejti, ndërsa pas nënshkrimit do të kalojë në procedurën e ratifikimit në Parlamentet e të dy vendeve dhe ky proces mund të marrë rreth 3 muaj kohë”, thonë nga MD-ja.
Sipas legjislacionit në fuqi, për ta marrë miratimin e Kuvendit, pro marrëveshjes duhet të jenë 2/3 e deputetëve.
Kronika e realizuar nga gazetarja Florijeta Dernjani.
