U mblodhën pranë Fakultetit të Studimeve Islame.
E shkak u bë promovimi i programit “Akademia – Studime Islame dhe Lidership”.
Kjo akademi ka program njëvjeçar për të diplomuarit jashtë vendit në studime Islame dhe për të tjerët të interesuar për këto studime.
E qëllimi i programit “Akademia Studime Islame dhe Lidership” është të ndihmojë të diplomuarit jashtë vendit të ambientohen me rrethanat dhe traditat vendore, që të arrijnë të artikulojnë dhe zbatojnë njohuritë e tyre në mënyrë efektive.
Programi përmban elemente akademike dhe profesionale për të ofruar një përvojë të pasur intelektuale dhe praktike.
E për një fjalë rasti u deklarua myftiu i Kosovës, Naim Tërnava.
“Konfirmimi dhe hapja e kësaj akademie dhe promovimi i programit përfshin në vete edhe shpalljen e një strategjie të re brenda Bashkësisë Islame dhe FSI-së duke përfshirë kështu programe të vetëdijesimit dhe të ndërgjegjësimit si dhe formimit të një lidershipi që ka për qëllim zhvillimin dhe afrimin e besimeve, kulturave, qytetërimeve, bashkëjetesës e respektimit të diversitetit brenda shoqërisë sonë, u tha Tërnava.
Ndërsa specifikat e kësaj akademie i tregoi dekani i Fakultetit të Studimeve Islame, dr. Islam Hasani.
“Programi do të ofrohet në dy semestra, secili prej tyre nga 15 javë. Ligjëratat janë obligative me prezencë fizike. Programi përmban Bazat e besimit islam, doktrina e ehli synetit, jurisprudenca islame – historiku dhe zhvillimi i saj, sistemi ligjor në Kosovë, historia e Kosovës dhe institucioneve të BIK-ut, këshillimi fetar dhe shpirtëror, organizimi shoqëror në Kosovë”, tha Hasani
I pranishëm në programin e kësaj akademie ishte edhe drejtori i Agjencisë së Kosovës për akreditim, Naim Gashi.
Aty, Gashi u dha një lajm të pranishmëve.
“Njëra nga nëntë institucionet publike në Kosovë e cila është dorëzuar nga Republika e Kosovës në një marrëveshje rajonale të gjashtë vendeve të Ballkanit Perëndimor, në atë listë është edhe FSI-ja, kështu që posa të ratifikohet ajo marrëveshje, diplomat e FSI-së dhe të tjera institucioneve publike në Kosovë do të njihen me automatizëm”, tha Gashi.
Kriteret për hyrjen në program janë shtetësia kosovare, ose statusi i rezidentit të përhershëm apo shtetas të vendeve fqinje që dëshirojnë të studiojnë në këtë akademi.
Ndërsa kriter shkollor është medreseja si niveli më i ulët dhe doktoratura si nivel më i lartë.
Si dhe studentët të kenë rrjedhshmëri në gjuhën shqipe, pasi që studimet dhe ligjëratat do të mbahen në gjuhën shqipe.