Tetë ditë para shpalljes së aktgjykimit për Hashim Thaçin, Kadri Veselin, Jakup Krasniqin dhe Rexhep Selimin në Hagë, aktivistë të organizatës “Liria ka Emër” kanë zhvilluar një aksion simbolik para objektit të EULEX-it në Prishtinë.
Në aksionin e tyre, aktivistët kërkuan që ish-krerët e Ushtrisë Çlirimtare të Kosovës të shpallen të pafajshëm.
“Në emër të popullit, shpalleni të pafajshëm”, shkruhej në banerin ku ishin të vendosura figurat e Thaçit, Veselit, Krasniqit dhe Selimit.
Në lidhje me zhvillimet në Gjykatën Speciale, kryeministri në detyrë, Albin Kurti, ka deklaruar se nuk ka informacione se çfarë vendimi është marrë në këtë proces.
Katër ish-krerët e UÇK-së janë në pritje të aktgjykimit në rastin që po gjykohet në Dhomat e Specializuara të Kosovës në Hagë. Aktgjykimi pritet të shpallet në seancë publike më 16 shtator.
Ndryshe, protesta në Prishtinë është paralajmëruar për 12 shtator, ku organizatorët pritet të kërkojnë sërish një vendim lirues për katërshen e UÇK-së./teve1.info/
