Institucionet e Kosovës do të organizojnë nesër, më 28 gusht, një vizitë në lokacionin e varrit masiv në Kalludër të Komunës së Zubin Potokut, në kuadër të aktiviteteve për shënimin e 30 gushtit – Ditës Ndërkombëtare të Viktimave të Zhdukjeve me Forcë.
Aktiviteti do të nisë në orën 12:00 dhe organizohet nga Policia e Kosovës, përmes Drejtorisë për Hetimin e Krimeve të Luftës, Komisioni Qeveritar për Persona të Zhdukur dhe Instituti për Mjekësi Ligjore, në bashkëpunim me shoqatat e familjeve të personave të zhdukur.
Sipas njoftimit zyrtar, vizita në Kalludër ka për qëllim nderimin dhe përkujtimin e viktimave të zhdukjeve me forcë, si dhe shprehjen e solidaritetit dhe përkrahjes ndaj familjeve që vazhdojnë të kërkojnë përgjigje për fatin e të afërmve të tyre.
“Familjet e personave të zhdukur, për më shumë se dy dekada, vazhdojnë të kërkojnë zbardhjen e së vërtetës dhe të fatit të më të dashurve të tyre”, thuhet në njoftim.
Institucionet kanë theksuar se aktiviteti organizohet në frymën e bashkëpunimit të ngushtë ndërinstitucional dhe në partneritet me shoqatat e familjeve të personave të zhdukur, duke vlerësuar kontributin e tyre në procesin e kërkimit dhe zbardhjes së fatit të personave të zhdukur./teve1.info/
