Inspektorati Policor i Kosovës ka njoftuar se në operacionin e sotëm nga Prokuroria Themelore në Prishtinë ka arrestuar tre zyrtarët policor të dyshuar në këtë rast.
Sipas njoftimit të IPK-së, me vendim të Prokurorit u është caktuar masa e ndalimit për 48 orë, kurse ndaj zyrtari tjetër rasti është vazhduar në procedurë të rregullt.
“Duke ju referuar operacionit të sotshëm të udhëhequr nga Prokuroria Themelore në Prishtinë, përkatësisht Departamenti për Krime të Rënda, në koordinim dhe bashkëpunim të ngushtë me Inspektoratin Policor të Kosovës (IPK) dhe Drejtorinë për Hetimin e Krimeve Ekonomike dhe Korrupsion, janë shoqëruar në objektin e IPK-së katër zyrtarë policorë të dyshuar në këtë rast.Pas intervistimit tre zyrtarë policorë janë arrestuar dhe me vendim të Prokurorit u është caktuar masa e ndalimit për 48 orë kurse ndaj një zyrtari tjetër rasti do të vazhdoj në procedurë të rregullt”, thuhet në njoftim.
Ndërkohë, IPK ka bërë të ditur se operacioni është realizuar në disa lokacione në Prishtinë, Fushë-Kosovë dhe Obiliq, ku në bazë të kësaj janë bastisur 5 persona zyrtarë dhe dy persona civilë\qytetarë të dyshuar për përfshirje në veprimtari kriminale që lidhen me disa vepra penale.
“Operacioni është realizuar në disa lokacione në Prishtinë, Fushë Kosovë dhe Obiliq në bazë të urdhëresës se Gjykatës Themelore në Prishtinë dhe ka përfshirë bastisjen e pesë (5) personave zyrtarë dhe dy (2) personave civilë/qytetarë, të dyshuar për përfshirje në veprimtari kriminale që lidhen me disa vepra penale.Hetimet lidhur me këtë rast ndaj katër zyrtarëve policorë janë duke u zhvilluar në koordinim me Prokurorinë Themelore në Prishtinë me dyshimin për veprat penale “Keqpërdorim i pozitës apo autoritetit zyrtar”, “Shkelje e fshehtësisë së procedurës” dhe “Marrja e deklaratave me anë të shtrëngimit”, thuhet tutje në komunikatë./teve1.info/
