KryeshefI i ndërmarrjes “Trepça” në Mitrovicë, Bashkim Kurti me rastin e 35-vjetorit të Grevës së Minatorëve ka theksuar sfidat me të cilat përballen minatorët e që sipas tij janë: lufta për siguri, trajtim të drejtë e menaxhim të përgjegjshëm.
Kurti ka thënë se nuk duhet harruar mundi i minatorëve që ndërtuan themelet e së ardhmes.
“Sot në 35-vjetorin e Grevës së Minatorëve le të kujtojmë për të mos harruar kurrë trashëgiminë, djersën, mundin dhe triumfin që ndërtuan themelet e së ardhmes së kombit tonë. Pranojmë sfidat përpjekjet më të cilat përballen minatorët si lufta për siguri, trajtim të drejtë dhe menaxhim të përgjegjshëm”, ka thënë ai.
Më tej, ai ka vlerësuar se është frymëzues angazhimi i palëkundur i minatorëve të Trepçës për të menaxhuar në përgjithësi minierën dhe për ta modernizuar atë.
“Çdo ditë e më shumë po dëshmohet se Trepça qëndron e pathyer, kurse zgjuarsia dhe angazhimi i pa lëkundur i minatorëve të saj vazhdon të frymëzoj dhe këtë e shohim në përpjekjet e vazhdueshme për të menaxhuar në përgjithësi minierën dhe për ta modernizuar atë, duke siguruar të ardhmen e saj edhe për brezat që do të vijnë. Kjo reflekton nga vet qytetarët që u lindën dhe u rritën përkrah Trepçës dhe që arritën të ndërthurin jetën e tyre përgjithmonë me fatin e saj”, ka shtuar ai. /teve1.info/
