“Ndrysho për Kosovën!” është motoja që mblodhi studentët e gazetarisë së Universitetit të Prishtinës për të zhvilluar kampanjën e tyre si thirrje për ruajtjen e mjedisit.
Kjo fushatë shoqërore është zhvilluar në kuadër të studimeve master në kursin “Teori dhe Praktikë e Marrëdhënieve me Publikun”, meqë rast studentët me video, pod cast-e, fotografi e grafika të shumta synojnë vetëdijesimin e popullit se duhet ndryshuar për një Kosovë të pastër e fisnike.
Profesori që mbikëqyri punën e studentëve gjatë tërë rrugëtimit, Arben Fetoshi e cilësoi këtë kampanjë si të nevojshme në një kohë kur gjendja mjedisore në Kosovë është tejet e degraduar.
“Studentët e kanë përgatitur fushatën si detyrë në kuadër të praktikës së Marrëdhënieve me Publikun, pas një hulumtimi të gjendjes mjedisore dhe përcaktimit të Facebook e Tik Tok si kanale të përshtatshme për audiencën e targetuar (të rinjtë dhe më të moshuarit). Mesazhet e hartuara për këtë fushatë janë përmbajtje të formateve të ndryshme të kombinuara, të cilat transmetohen si video, posterë, tekste apo pod cast-e, që kanë për qëllim, nga njëra anë, alarmimin lidhur me katastrofën mjedisore, dhe nga ana tjetër, vetëdijesimin e publikut për domosdoshmërinë që të ndryshojmë. Fushata NDRYSHO! Kërkon ndryshimin e qasjes, sjelljes dhe përkushtimit tonë për Kosovën, prandaj si mentor i tyre, do të isha shumë i lumtur të shoh që ajo mirëpritet dhe ka efekt nxitës për njerëzit.”, deklaroi Fetoshi për Tëvë1.
Mesazhi kryesor në tërë këtë angazhim të shumë studentëve është se prona publike duhet ruajtur njësoj sikurse ajo private, pra të bëhemi gardian i natyrës.
Simbolikë e kësaj kampanjë është përdorimi i ngjyrave të flamurit të Kosovës, bardhë, verdhë dhe kaltër, që me një kolazh na dërgojnë tek idealja, Kosova e blertë.
Kjo fushatë shoqërore e cila është në të mirën e vendit, parashihet të arrij objektivat e saj përmes formave të ndryshme që kanë përzgjedhur ideatorët.
Për vite me radhë në Kosovë gjatë muajit maj, data 24 është shoqëruar me pastrimin e pronës publike nga aktivitete të ndryshme në vend./teve1.info/
