Derbi kosovar në Ligën Ballkanike ndërmjet Pejës dhe Sigal Prishtinës, i zhvilluar të enjten mbrëma në Gjakovë, mund të përsëritet, shkaku i gabimeve të gjyqtarëve.
Kjo ndeshje u karakterizua me vendime të shumta të dyshimta nga gjyqtarët e ndeshjes të cilët dëmtuan kryesisht të dyja ekipet dhe kjo shihej qartë në transmetimin televiziv të ndeshjes.
E këto gabime i ka pranuar edhe Drejtori i Ligës Ballkanike, Shay Shtriks i cili ka nisur një reagim zyrtar elektronik, drejtuar klubeve të përfshira në këtë rast dhe FBK-së.
I pari i Ligës Ballkanike, ka pranuar së paku 7 gabime të gjyqtarëve në këtë ndeshje, por i ka arsyetuar me faktin se edhe ata janë njerëz dhe mund të gabojnë dhe se ato ishin të paqëllimta.
Shtriks e ka veçuar rastin në 10 sekondat e fundit të ndeshjes, në të cilin ai thotë se kishte faull ndaj Henrik Shirkos dhe ku gjyqtarët nuk e gjykuan si të tillë, por që sipas tij gabimi është bërë pa qëllim.
Sipas Shtriks, nëse dikush ofron fakte për ndonjë manipulim eventual të kësaj ndeshje apo gjëra tjera, atëherë do të vendosin që kjo ndeshje të përsëritet.
