Ndërtimi i nënstacioneve policore në veri të vendit po konsiderohet si një hap pozitiv në aspektin e sigurisë në atë pjesë. Madje kjo po vlerësohet se i dërgohet edhe mesazh shtetit serb por edhe do të ofrojë siguri më të madhe për banorët e asaj zone.
Dy kilometra nga kufiri me Serbinë, do të vendoset Policia e Kosovës.
Të hënën u vendos gurthemeli i nënstacionit në Izvor të Zveçanit nga kryeministri bashkë me ministrin e Brendshëm dhe drejtorin e Policisë.
Kurti bëri të ditur se brenda muajit të përfundojë ndërtimi ku do të vendosen pjesëtarë të Njësisë së Ndërhyrjes së Shpejtë.
Ndërtimi i këtyre nënstacioneve po shihet si i mirëseardhur dhe se kontribuon në shtimin e sigurisë në atë pjesë të vendit.
Nënkoloneli në pension i Policisë, Refki Morina thotë se me këto veprime, qytetarët do të ndihen më të sigurt por edhe do ta rrisin bashkëpunimin me institucionin e sigurisë.
“Kjo është një mesazh edhe për shtetin fqinj për arsye se i tregohet shtetit fqinj se pjesa veriroe është mbuluar në tërësi me stacione policore që do të jenë konform ashtu qysh e kërkon edhe Bashkësia Evropiane të jenë stacionet policore dhe një organizim i tillë dmth do të jetën jë grusht i fortë për pushtetin serb për arsye se do të shihet realisht se Policia e Kosovës tani është e aftë me vepru jo vetëm në aspektin operacional”, ka deklaruar ai.
Sipas tij, për shkak të tensionimit të situatës ngritja e bazave të Policisë ka qenë e pamundur në të kaluarën.
“Për shkak të grupeve terroriste dhe të tyre mirë të organizuara siç ishte rasti i Banjkës por edhe armatimit të cilët për ditë gjen Policia e Kosovës nëpër shtëpitë, vendlokalet e ndryshme të cilët kanë qenë pjesë e atij grupi të Banjkës. Prandaj unë mendoj se koha tani është që gradualisht të kemi stacione policore, të kemi një stabilitet më të fortë të Policisë së Kosovës, një organizim më të mirë të Policisë së Kosovës”, tha ai.
Kurse ish-ushtaraku vlerëson se për shkak të kërcënimeve të hapura të Serbisë, gjithmonë duhet investuar në infrastrukturë për mbrojtjen e vendit.
“Në qoftë se këto kalkulime janë bërë mirë dhe në përputhje me vendimet politike, atëherë sigurisht që edhe rezultati del i mirë dhe pozitiv. Mirëpo në qoftë se kalkulimet politike nuk përputhen me ndërtimin e tyre dhe me forcimin e këtyre kapaciteteve mund të pasojë një rrezik në kuptimin që nuk do tëk emi mbështetje prej atyre faktorëve të cilët duhet ta kemi”, ka deklaruar koloneli në pension i FSK-së, Hysen Gecaj.
Javën e kaluar u vendos gurthemeli i i nënstacionit policor tek Ura e Lumit Bistricë.
