Është ndërruar prokurori i rastit që po heton dyshimet për parregullsi gjatë numërimit të votave në Qendrën e Numërimit në Mitrovicë.
Lajmin e ka konfirmuar për Tëvë1 ushtruesi i detyrës së ministrit të Drejtësisë, Blerim Sallahu.
“Pas kërkesës, kryeprokurori ka marrë të gjitha hapat e nevojshëm dhe ka ndërruar prokurorin, në mënyrë që rasti të trajtohet sa më objektivisht,”
ka deklaruar Sallahu.
Sipas tij, në vend të prokurorit Shpëtim Peci është caktuar Sahit Tmava.
Numërimi i votave të balotazhit të 9 nëntorit në Mitrovicën e Jugut ishte ndërprerë përkohësisht me urdhër të Prokurorisë Themelore, pas ngritjes së dyshimeve për parregullsi në proces.
Ndërkohë, Prokuroria ka urdhëruar rinumërim të plotë të votave në këtë komunë, në mënyrë që të sigurohet transparencë dhe integritet i procesit zgjedhor.
Ushtruesi i detyrës së ministrit të Drejtësisë, Blerim Sllahu poashtu sot gjatë ditës ka kërkuar nga Kryeprokurori i Prokurorisë në Mitrovicë, Njazi Rexha të përjashtohet nga rasti ku po hetohet për manipulim të votave.
Ai kërkesën e ka drejtuar te ushtruesi i detyrës së Kryeprokurorit të Shtetit, z. Besim Kelmendi
Sallahu ka thënë se arsyeja e kërkesës është për shkak të ekzistimit të kërkesës së konfliktit të interesit.
