Sot është paraparë të mbahet seanca e radhës në rastin “Telkos”. Këtu ish-kryeshefi i KPM-së, Luan Latifi, po akuzohet se në bashkëkryerje ka kryer veprën penale “Marrja e ryshfetit”. Por, seanca u ndërpre, pasi kryeprokurori i Prokurorisë Themelore në Prishtinë, nuk është përgjigjur në një parashtresë të të akuzuarit.
I akuzuari kërkoi përjashtimin e prokurores nga rasti, kryeprokurori nuk ktheu përgjigje
Të enjten seanca gjyqësore në rastin “Telkos” nuk shkoi siç ishte planifikuar.
Arsyeja për këtë, ishte një kërkesë e të akuzuarit, ish-kryeshefit të Komisionit të Pavarur për Media, Luan Latifi.
Ky i fundit, kishte dorëzuar një parashtresë, ku kërkonte përjashtimin nga rasti, të prokurores, Merrushe Llugiqi.
“Në momentin që vjen një kërkesë duhet më vendos kryeprokurori”, tha Alban Ajvazi, gjyqtar i rastit.
E përgjigja për këtë, nuk ishte kthyer nga zyra e kryeprokurorit të Prokurorisë Themelore në Prishtinë.
“Unë dje jam njoftuar më kërkesën e palës së akuzuar, për të njëjtën unë kam kërkuar përgjigje nga zyra e kryeprokurorit, mirëpo deri në këto momente nuk kam përgjigje”, tha Merrushe Rrugiqi, prokurore e rastit.
E pas kësaj, trupi gjykues vendosi që seanca të ndërpritet.
“Gjykata nuk do të vazhdojë me shqyrtimin gjyqësor në lidhje me këtë çështje dhe merr aktvendim, shqyrtimi i sotëm ndërpritet”, tha gjyqtari i rastit, Alban Ajvazi.
Seanca e radhës u caktua me 1 nëntor në ora 9:30.
Ndryshe, sipas aktakuzës së prokurorisë, ish-drejtuesit e KPM-së, Luan Latifi dhe drejtori Arben Bilalli, kërkuan ryshfet nga kompania “Telkos”.
Për këtë rast, ish-drejtori i Administratës dhe Financave në KPM, Arben Bilalli, është dënuar me 140 ditë burgim dhe 12 mijë euro gjobë.
