Me të nisur, seanca e shqyrtimit fillestar ndaj Jovan dhe Dragisha Viqentijeviq, të akuzuar për sulmin terrorist në kanalin e Ibër-Lepencit, është ndërprer.
Ndërprerja e seancës u bë për të shqyrtuar kërkesën e mbrojtjes për përjashtimin e prokurorit të rastit, Bekim Kodraliu.
Avokati i Jovan Viqentijeviq, Nebojsha Vllajiq, tha se prokurori i rastit ka qenë i njëanshëm gjatë hetimeve dhe nuk ka pranuar asnjë kërkesë të mbrojtjes. Ai theksoi se detyrë ligjore e prokurorit është të marrë parasysh provat që rëndojnë, por edhe ato që shfajësojnë të pandehurin.
“Prokurori special nuk ka nisur hetimet sipas kërkesave të mbrojtjes. Dje ia dorëzova zyrtarisht kryeprokurorit këtë kërkesë. Prokurori është i detyruar ligjërisht t’i marrë në konsideratë provat që mund të ndikojnë pozitivisht ose negativisht te të pandehuri, por nuk është vepruar kështu. Për këtë arsye, kërkojmë përjashtimin e tij dhe shtyrjen e seancës,” tha Vllajiq.
Në mbështetje të kolegut të tij, avokati i Dragisha Viqentijeviqit, Millosh Deleviq, tha se gjatë hetimit prokurori nuk ka shqyrtuar provat e propozuara nga mbrojtja dhe kërkoi shtyrje të seancës.
“Prokurori ka qenë i detyruar të shqyrtojë provat që rëndojnë për përgjegjësinë penale të klientit tim dhe kërkoi që seanca të shtyhet derisa të merret vendim për kërkesën tonë,” deklaroi Deleviq.
Prokurori special Bekim Kodraliu reagoi duke thënë se pesë arsyet e parashikuara në Kodin e Procedurës Penale për përjashtim të prokurorit nuk janë argumentuar nga mbrojtja.
“Sulmi ka qenë profesional dhe hetimet janë zhvilluar me partnerë ndërkombëtarë. Nuk ka qenë e mundur të vlerësojmë se cilët nga personat e propozuar si dëshmitarë mund të trajtoheshin si të tillë. Propozimet e mbrojtjes janë analizuar me kujdes, por janë konsideruar jo-relevante,” tha Kodraliu.
Ai shtoi se, lidhur me kërkesat për të dhënat e antenave telefonike, Dragisha Viqentijeviq ka përdorur një numër telefoni të Serbisë, ndaj Prokuroria Speciale ka kërkuar bashkëpunim nga autoritetet serbe, por nuk ka marrë përgjigje.
Ndërkaq, avokatja e të akuzuarit të tretë, Igor Dimoviq, tha se nuk ka vërejtje për prokurorin.
Kryetari i trupit gjykues, Vesel Ismajli, njoftoi se seanca do të ndërpritet deri sa kryeprokurori të marrë vendim për kërkesën e mbrojtjes.
“Janë të obliguar që të presin vendimin e kryeprokurorit për kërkesën e përjashtimit. Deri atëherë, seanca ndërpritet,” deklaroi Ismajli.
Seanca pritet të vazhdojë pas marrjes së vendimit lidhur me kërkesën për përjashtimin e prokurorit.
