Kryetari i PDK-së, Bedri Hamza ka akuzuar Lëvizjen Vetëvendosje për mungesë serioziteti dhe përgjegjësie në procesin e konstituimit të Kuvendit të Kosovës.
Sipas tij, moskonstituimi i Kuvendit po e lë Kosovën në vakum institucional, duke dëmtuar funksionimin e shtetit, perspektivën e vendit dhe interesat e qytetarëve.
“Siç edhe mundët me vërejt dhe me e përcjellë, kjo është një shenjë e mungesës së seriozitetit dhe përgjegjësisë nga partia që ka fituar numrin më të madh. Po shihet që vazhdojnë sjelljet e tyre të papërgjegjshme në raport me institucionet e Kosovës. Thirret seanca thuajse në ditën e fundit, në përputhje me Kushtetutën dhe ligjet, që ta kemi konstituimin e Kuvendit, e në fund dalin e mbajnë fjalime politike, abuzojnë me opozitën dhe me kryesuesin. Në vend që ta propozojnë emrin për kryetar, e shtyjnë propozimin e emrit dhe nuk konstituohet Kuvendi i Kosovës. Kosova vazhdon me mungesë dhe me vakum institucional. Kjo e dëmton vendin dhe e prek perspektivën e vendit, por edhe qytetarët e Republikës së Kosovës”.
Hamza shtoi se këto sjellje duhet të marrin fund dhe se përgjegjësia për tejkalimin e situatës i takon partisë fituese.
“Besoj që këto sjellje të papërgjegjshme duhet të përfundojnë dhe kjo i takon partisë fituese”, u shpreh Hamza.
