Kompania Rajonale e Ujësjellësit (KRU) “Prishtina” ka njoftuar se një ndërprerje e paplanifikuar e energjisë elektrike në Impiantin e Trajtimit të Ujit (ITU) në Shkabaj pritet të shkaktojë probleme në furnizimin me ujë për një pjesë të konsumatorëve.
Sipas njoftimit të kompanisë, energjia elektrike është ndërprerë sot rreth orës 11:00, pa ndonjë paralajmërim paraprak nga KEDS.
Si pasojë e kësaj ndërprerjeje, pritet të ketë ndikim në furnizimin me ujë për konsumatorët në Komunën e Fushë Kosovës dhe në lagjen Kalabria në Prishtinë.
“Energjia elektrike është ndërprerë sot rreth orës 11:00, pa ndonjë paralajmërim paraprak nga KEDS. Si pasojë, pritet të ketë ndikime në furnizimin me ujë për konsumatorët në Komunën e Fushë Kosovës dhe në lagjen Kalabria në Prishtinë”, thuhet në njoftimin e KRU “Prishtina”.
Kompania ka bërë të ditur se, bazuar në informacionet e marra, furnizimi me energji elektrike pritet të rikthehet rreth orës 15:00.
KRU “Prishtina” ka theksuar se ndërprerjet disaorëshe të energjisë elektrike ndikojnë drejtpërdrejt në funksionimin e sistemit të ujësjellësit dhe vështirësojnë furnizimin e rregullt me ujë.
“Mungesa e energjisë elektrike për disa orë e destabilizon furnizimin me ujë dhe shkakton vështirësi në sistem”, thuhet në njoftim.
Kompania ka shprehur shqetësim edhe për faktin se ndërprerja e energjisë elektrike, sipas saj, është bërë pa asnjë njoftim paraprak nga ana e KEDS-it.
