Ndihma ushqimore për 1 milion refugjatë në Ugandë është ndërprerë plotësisht këtë javë për shkak të një mungese të madhe fondesh në Programin Botëror të Ushqimit të Kombeve të Bashkuara (WFP). WFP kishte paralajmëruar se i nevojiteshin urgjentisht 50 milionë dollarë për të ndihmuar refugjatët që ikin nga konfliktet në Republikën Demokratike të Kongos, Sudanin e Jugut dhe Sudanin.
Uganda strehon aktualisht mbi 1.8 milionë refugjatë – numri më i madh në Afrikë – me 60,000 të sapoardhur vetëm në tre muajt e fundit. Niveli i kequshqyerjes në qendrat e pranimit ka arritur në pikë kritike, me mbi 15%, ndërsa racionet ushqimore ishin reduktuar deri në 80% përpara se të ndaleshin krejtësisht, raporton The Guardian.
Ministri i Refugjatëve të Ugandës, Hillary Onek, fajësoi shkurtimet drastike të ndihmës nga vendet perëndimore, përfshirë ngrirjen e financimeve nga SHBA gjatë presidencës së Donald Trump dhe uljen e ndihmës nga Britania nga 0.58% në 0.3% të të ardhurave kombëtare. “Refugjatët do të vuajnë pasojat,” tha Onek, duke paralajmëruar për dhunë të mundshme, trazira dhe kthime të detyruara nëse ndihma nuk rifillon.
UNHCR ka nisur një apel të veçantë prej 44 milionë dollarësh për të ndihmuar refugjatët e rinj nga Kongo, por presioni mbi ushqimin, strehimin dhe kujdesin shëndetësor vazhdon të rritet.
Refugjatët në kampin Bidi Bidi, një nga më të mëdhenjtë në Afrikë, shprehen të dëshpëruar. “Ne kemi mbijetuar me racionet ushqimore. Pa to, njerëzit do të vdesin nga uria,” tha Simon Okello, një refugjat nga Sudani i Jugut.
Organizatat humanitare paralajmërojnë se kriza mund ta detyrojë Ugandën të braktisë politikën e saj mikpritëse ndaj refugjatëve, nëse nuk rifillon mbështetja ndërkombëtare.
