Greva e punëtorëve të Trepçës ka përfunduar mbrëmë në ditën e dhjetë, pas arritjes së marrëveshjes për realizimin e kërkesave të parashtruara nga ana e minatorëve.
Me këtë rast, Ndërmarrja “Trepça” ka publikuar letrën e minatorëve me katër kërkesat e parashtruara, teksa në përgjigjen e Bordit të Përkohshëm të Drejtorëve të “Trepçës” ndaj minatorëve është thënë se do të plotësohen vetëm tri prej tyre.
Sipas letrës së publikuar, kërkesat të cilat do të plotësohen janë “Paga e minatorit prej 6-19 të muajit, të shpallet konkursi i KE-së dhe të përmirësohen kushtet e sigurisë”.
Teksa, ajo për “Tërheqjen e vendimeve të nxjerra nga greva” do të analizohet dhe shqyrtohet në vijmësi.
“Ne, Bordi i Përkohshëm i Drejtorëve, i kemi trajtuar me shumë kujdes kërkesat e adresuara në letrën e mëposhtme dhe mund t’ju sigurojmë që këto kërkesa ne i kemi prioritizuar në strategjinë tonë të punës, madje disa prej tyre edhe i kemi trajtuar. Ne, Bordi i Përkohshëm i Drejtorëve jemi në pajtueshmëri të plotë me kërkesat e paraqitura nga ju, sepse janë dhe prioritet tona tashmë. Ne Bordi i Përkohshëm i Drejtorëve pajtohemi me pikat 1, 2 dhe 3. Kërkesa e fundit e letrës tuaj ju sigurojmë që do të analizojmë dhe shqyrtojmë në vijmësi vendimet e KE-së, përfshirë ato nga data 27.10.2023”, thuhet në letrën e Bordit të Përkohshëm të Drejtorëve të Trepçës drejtuar minatorëve.
Minatorët kanë hyrë në grevë të martën e javës së kaluar me kërkesat për realizimin e pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani, kërkesa për sigurim shëndetësor dhe përmirësimin e kushteve.
Gjatë kësaj kohe sa ishin në grevë, shumë nga ta kishin probleme shëndetësore dhe u është ofruar trajtim mjekësor. /Teve1.info/